بیا منی قاصد اؤ کپوت چاھی*
بلبل گفتار ؤ منی وش گوشین قاضی*
مۓ دلی دوست ؤ ھمدلین رازی*
بند وتی لانکا اصفرا غازی*
رھت ؤ پالام کن دولدولا تازی*
بندی پہ دلبندا زینا ھجازی*
دۓ رکابا پادان پیشگاھی*
نیندی پہ ونگا دلجم ؤ دراھی*
دار لگاما ؤ بانزلان بازی*
کلیگا آپ کن چہ باغچھا مالی*
تیز ؤاشتاپ کن مرغ وقاب بالی*
دور کن چہ بلوچستانے زئیدا پہ گاھی*
بیا چہ آپبندان باغین سربازی*
شاما نوش کن چہ کزور کورا ماھی*
نیند منی برزین ماڈیا شاھی*
ساھگ ؤ دیوانا مڈا گاھی*
گر منی نزدیکین کشا جاھی*
چو سپاھی ؤ راھزنا ڈاھی*
گپان دلگوش کن شر پہ آگاھی*
شنگ کن منی پیغاما باندا گوامگواھی*
مکران دراھین کونڈان ھر جاھی*
گوھرین دپ گالان مئ سخندامی*
شئر ؤ پربندان چہ میرین آسکانی*
دست ترینان چست ؤ چالاکی*
پشت اسفیتین کاغدا تاکی*
نقش کنان سطران پر ھوسناکی*
گالان سنگاران پر مداد چاکی*
کہ گورجتگ مارا مرچی دلتنگی*
دل منی ژند انت پیشیگین سنگی*
کسوے وشین گوشان جنگی*
پر زھیروک ؤ طبلہ ؤ چنگی*
یک حکایت پر مردوران ھنگی*
وش ؤ ڈولدار ات دور بلوچی رنگی*
جنگ ؤ پیکار ات گون دولت فرنگی*
اھدیگین عادات بیت انت کم رنگی*
پیداگ بیت نوکین دھرے ھمرنگی*
ظاھر انت نوبت پہ نوکران زنگی*
بیا منی شھزادگ مڈا دارین*
مۓ دلے دردانی شری دارین*
کہ غلوے زورتگ ڈیلا مۓ بارئین*
دئیان ترا احوالان سئ ؤ چارین*
چہ پیسری مۓ دورا بلوچ جوانین*
موسمی چار فصلان برکت دارین*
شنزگان وشین ھور بہار چارین*
روغن ؤ شیر ؤ مردم مال دارین*
گوروم ؤ میش ؤ بز شپانک دارین*
گندم ؤ برنج ؤ جوھان سپاہ دارین*
مضاتیگ ؤ شوکشیچی نایان پات دارین*
کیلڈ ؤ کلیر ؤ کونر آپ دارین*
تیہرین ماتبندان آھوگ رم دارین*
مردان گون تیر کمانا سیاد دارین*
راہ روئین نریانا تیز ؤ ڈولدارین*
مہریگی گومس ؤ مہارا پل دارین*
مکرانی مردان میر میار دارین*
کہ پہ بزگ ؤ مسکینان خیال دارین*
بست وتئ سر پہ میارا زیب دارین*
گون بستگین سنجان بلوچ امانت دارین*
چیر چت انت دنیای بی وفا دارین*
وپت انت پہ سیاہ ڈنی سرے دراھین*
سر منی پشت کپت گون غمان گرانین*
کہ گالان پربندان پر دلے ناکامین*
کئ پر ا ے دنیایا دلا بندی*
سھبے روت بیگاھے ساھگ رؤ زردی*
گوش نہ کنت سوج ؤ مصلحت چندی*
پر وتی زور ؤ قدرتء گرندی*
روت کلاتء ؤ ماڈی ء نیندی*
عنطر ؤ مسکان پر وتء چنڈی*
ھمسر ؤ بیلانی مجلسء قندی*
بی سرین گال ؤ ٹہلان پربندی*
ھچ کس نہ مان ایت پہ دولت ؤ مردی*
شاہ ؤ پول داران دور پد ؤ رندی*
عاقبت ملکموت ترا یک روچے گیندی*
اے شاھی بیم دار ایں گینء تئ سندی*
بلے گوستگ ایں دورء میر بلوچ مردی*
رد کنان چندے گال خردمندی*
نیت پر پلئین میر کزور کئوری*
میر غلام محمد ابن آدم آسکانی*
مادرء رود اینت پہ دل ؤ جانی*
پہ روغن ؤ شیر ؤ بینگء جامی*
من دئیان تعریفے ترا خانی*
یک لائک ایں اوصافے دل ؤ جانی*
تحفہ ؤ پیش کشے گلندامی*
یک یاسمین پلے پہ میرے سوغاتی*
رؤستگ ایں سئول ؤ خیلء پشتنکی*
ساھگء سارت ایں سروء سر تنکی*
جنتی وش بؤ ایں گلء مسکی*
کہ چہ صورتۓ مھر ؤ مادری چکی*
غلام جان وش ات تئ دیوان ؤ مڑاگاھی*
سارت ات تئ کلء ساہ منیند جاھی*
وش ات تئ چار ایں روچ بہارگاھی*
وش ات تئ دیدار ؤ سرا آگاھی*
ھنچو پہ مال ؤ ھنچو باغ داری*
ھنچو پہ سیاد ؤ قوم ؤ راج داری*
ھنگوری ترنجان دل منی کشی*
ھنجر ؤ خالگ ؤ ھناران تئ وشی*
گرد بن این گونگ ؤ مضاتیگان بشی*
سیب ؤ نارنج ؤ لیمبوان تروپشی*
گندم ؤ جؤ ؤ اسپوست ڈولدار انت*
امب ؤ زیتون ؤ جم تئ آپ دار انت*
کوٹگ ؤ ول ؤ نیبگ گران بار انت*
ذرۃ برنج ؤ جوھان بار دار انت*
بزگل ؤ ھورت ؤ میر شپانک دار انت*
بہار گاہ ؤ حامینء چن ؤ وار انت*
وآنی پر ملکء مردمء بہر انت*
چل یک ؤ دیہک پر فقیران انت*
توصیفے عرض ایت میر ایں آسکانی*
قوم ؤ خویشانی راجے سرداری*
نان دے ؤ ڈاٹار ؤ نگن شانی*
دولدول ایں نریانء تچوک سواری*
ملگی بالاد گوں ڈیلء ڈولداری*
قندگ ؤ بچ قندان شکر داری*
دو تؤ تئ جفت ایں کارگر انت نررین*
گندم ؤ جوھان ؤ ڈگار گردین*
دو تئ نریان انت قلم بگوشین*
راہ رؤ ؤ دم دار ؤ وقاب بالین*
رود باری مھریگ شاھین رفتارین*
منزلان گوازین ایت سئ ؤ چارین*
کزور کئوری پہرا چو شیرا غرروک انت*
شیر دل ؤ نرفیل پنلنگ فروش انت*
سھب ؤ بیگاہء وتئ مرکبء سوار انت*
مکران دراھین راہ رفتار انت*
پہ ھر وڈ ایں کارء شیر ؤ چالاک انت*
مجلس ؤ دیوانء میر ؤ تام دار انت*
پر تئ دیدارء ھر کس امیدوار انت*
مھری پر ملکے مردمء بہر انت*
بی وس ؤ مسکین ؤ غریب دار انت*
قوم ؤ خویشانی آھن این پئل انت*
گون حاکم ؤ سرداران گر ؤ دار انت*
ھمسر ؤ دوست ؤ برادری دار انت*
میر لال محمد کزور کئوری کمان دار انت*
دبیء میر ولی محمد راج ؤ مال دار انت*
میر جمال خاتون مکرانی شیر زال انت*
میر تئ بند ؤ میر آدمی فررند انت*
کہ پر تئ دیدار ؤ گیندا دلبند انت*
میر خیر محمد آشاری دین دار انت*
اشکستگء میر بجار مھماندار انت*
میر دوستین گیتچکیء مڑا دار انت*
کراچیء میر دین محمد غضب گوار انت*
میر دوست محمد بزنجکانی سردار انت*
عبدالکریم ؤ عبدالرحمانی مہتر ایں یار انت*
لال محمد مورتانی سرا گون انت*
میر تئ چق ایں وارثی رند انت*
پر ھموک سختیان سرا بند انت*
ملا اسحاق ماں کزورا قلم دار ات*
حاکم ایں مردانی راہ گرا گٹ ات*
ھونگ ؤ مورتانء میر اولیاء نام دار ات*
آسکانیانی دیوان ؤ مڑا گاہ ات*
میر داد محمد مان آشار تام دار ات*
حاکم ؤ سردار دایم بی وار ات*
جاری ات وش ایں دھر ؤ روچانی*
جاک ؤ صلوات ات میر بلوچانی*
نیندگ ؤ پاد آیئگ گران املانی*
دیزے نام چیہال ات بانوک کلانی*
سیر ؤ اعروس ات میر فقیرانی*
چاپ ؤ نازینک ات ٹیہ ؤ ٹینگانی*
پترا دیوان ات ھزم ؤ جودانی*
دلجم ایں ھمراہ گونئت انت جانی*
رفتگ میر پہ گودرء روچے*
اشکستگی مردان روک کت بن سوچے*
جیڈہ ؤ جنگی بی سرین جاکے*
پہ باغی سر کش ؤ مچی سر تاکے*
جاہ جتگ دینارزئ میر ؤ سرداران*
پشامگی مردوار ایں کمان داران*
میر کریم بخش ؤ گوھرام جاہ جت دل تنگی*
میر خورشید ؤ ملک محمد لانک بست پہ جنگی*
رفت انت اشتاپء چو جمبڈان ھوری*
پترا نشت انت میر کزور کئوری*
دلگوش کن شہزادگ کزور کئوری*
تئ سرے براہ ایت وش این نام داری*
بلے آتکگ ایں ما پہ زھر ؤ دل گرانی*
مطلب مۓ جنگ ؤ جیڈھئ داری*
یا کہ چہ کزور کئورء وتئ بوجیگء بار کن*
قومی ؤ خویشان بل ؤ انگار کن*
نیبگ ؤ باغان سوچ ؤ بی زار کن*
ڈیلء پر مۓ حدء امیدوار کن*
مارا پہ عذر ؤ منت ڈولدار کن*
چہ دو ایں شرطان مارا زیب دار کن*
میرا گوں شیران مصلحت بستگ*
کزور کئورء دراھیں میرا دل شوشتگ*
پشامگی کھچر ؤ زئیدء میرا کوچ کرتگ*
کزور کئوری میر بجاری میار کرتگ*
پشامگی پہرا میر منیند جاہ ات*
سرگر ؤ ناؤنت سبز ؤ آباد ات*
نیبگ ؤ باغی بی حساب دار ات*
ھر گورء قوم ؤ خویش ؤ راج دار ات*
پشامگ ؤ بریسکء میر برکت خان ڈولدار ات*
میر عبدالرسول مان جنگلء بلند شان ات*
جنگلء میر تاج محمد منیند جاہ ات*
میر قنبر بن کمال خانی پد ؤ رند انت*
میر تئ راج ؤ جرندے دوسواہ انت
میر کریم بخش ؤ گوھرام پشامگ نام دار ات*
سرکارے دوست ؤ ملکے سردار ات*
میر لال محمد بن تاج مجمد نگن شان ات*
میر فقیر محمد پشامگی رؤستگ این سئول ات*
سرگرء میر دین محمد باغ دار ات*
میر ملک محمد پشامگ مال دار ات*
میر فتح ناؤنتی کماش ریش ات*
غلام جان زامات ات شیر مزارانی*
دلجم ایں باسک ات شیر شکارانی*
میر میار ات پشامگینانی*
پل ایں سالونک ات میر دینارزئیانی*
مردم میارا پہ چادران بند انت*
نئ کہ پہ تیران کوڈل ایں بند انت*
میر شیرجان گون ایرانی نران زھر ات*
مولوی عبدالعزیز زاھدانی سردار ات*
مولوی عبدالمجید پارودی قرآن وان ات*
پیشنء مولوی عبداللہ تام دار ات*
دائمء للہ زئ ؤ دینارزئیانی جنگ ؤ پیکار ات*
پشامگی قوم ؤ مردم نا چار ات*
ھر دو این زئیان وت پہ وت واک ات*
پہ ذات ؤ ذریاتء جیڈہ ؤ جاک ات*
کونگران گرند ات نوک ایں یک جنگے*
میر خداداد نقصان بیت پہ عجب رنگے*
غرروک بیت میر خالد پہ دگہ پندے*
میر غلام قادر تفنگء ایر کن پہ سنگے*
نیت پر میر نظر بیت پہ دل تنگے*
شکل ایں وآن راھی بیت میر چہ تئ جرندے*
بور شلان بیت پر شمۓ پدان رندے*
کہ رفت انت پہ برز ایں کوھی ماتبندے*
بلک ایں گیر کنت مارا یک گرندے*
ناگھان سرکار جنتے دست بندے*
پہ عاقل ایں مردان اشارہ یک رندے*
یک وش ایں دھرے ماں پشامگء بیتگ*
دور امیرانی وش دلی گوستگ*
وش میاتکان یک کؤنبے زورتگ*
سینہ زھر وار ؤ دل حسد بیتگ*
کہ میرے نام مسک ؤ میزران بیتگ*
مکران ھر جاہء زران بیتگ*
چہ سیدہ ؤ حق ایں راست گوشان بیتگ*
تورسی چہ شاھین کردگار بیتگ*
بزان پشامگی مرد واران جتگ فکرے*
سازت اش جنگی حیلہ ؤ مکرے*
شؤر اش بستگ ماں سرین دربندے*
عہد اش بستگ پر شرط ؤ سوگندے*
سوچ اش میر دین محمدء داتگ یک چندے*
شھید کن جوان این شیرء پر پندے*
میر چہ احوالان نا سھیگ بیتگ*
وتئ ھشت نال ایں نریانء سوار بیتگ*
دیم پہ سرگری شھرے نیمگء رفتگ*
خان محمد ابن میرین ماں سرا بیتگ*
شیطان عبدالرحمن ابن دین محمدی گوکء سوار بیتگ*
نا خیالیء پہ سرپے آتکگ*
ترس ؤ بیمء چہ میرے وار بیتگ*
دستی پہ مرد وار ایں ردا برتگ*
میر ھما دیم ء جنتء رفتگ*
جاھی ماں باغ ایں فردوسء گپتگ*
چاردھی ماہء ماہ گرء گپتگ*
پشامگ تا آشارء تھار بیتگ*
سربازء کل ایں دنزے مان شانتگ*
باغ تئ پل ایں چہ دنزء گین مرتگ*
شاتول ؤ کبگان نالئگے زورتگ*
تئ بزگل ؤ ھورتن پہ زھیروکی گریتگ*
مھریگ تئ بنجاہء سرسران بیتگ*
غاریتگ پر واھوندء کہ زوال بیتگ*
مئ کمر آ روچی غمان فروشتگ*
کہ ساھگ تئ چہ بچانی سرا رفتگ*
خیز کتگ تئ بوران چو کوکوری گرندء*
سیتگ اش تیل مھار گون سربندء*
ارس شلان بیت انت بہ راہ رؤ ایں پندء*
میر یار محمد ؤ سید محمد جوان ایں سر چنڈء*
سوار بیت انت تئ نریانان چو غضب گرندء*
تیز ؤ اشتاپء رفت انت راھبندء*
بیڈؤ برت یکے پہ سرکارے جرندء*
یکے پہ میرین لال جانی رندء*
بیا کہ جنگ بیتگ میر میار دار این*
لائک ایں سردا شیر سپاہ دارین*
کزور کئوری شھزادگ مڑا دارین*
ایری کت وش ایں نامے یادگارین*
جاہ جتگ نؤدان چہ چابھاریچدء*
ریتکگ انت باغ ایں سربازی بندء*
گیشتر کزور کئوری دراھین ماتندء*
قومی ؤ سیادانی درست ایں دلبندء*
جونزئتگ کوہ ایں دل جگر سندء*
رؤنبتگ کل ایں قوم پہ دل ژندء*
پر دلے غمگین ایں ؤ دپ قندء*
پر تئ دیدار ؤ آخری گیندء*
جونبتگ ایرانی لشکر پہ جنگی*
ھر وڈ ایں پیت دار ؤ بازرس سرھنگی*
نزیکء نیل ایت ھمبلان جانی*
میتء ھچ پیم ندات شانی*
شھید تئ جسم تک سئ روچ ایر بیتگ*
چو چاردھی ماہء نور عیان بیتگ*
زعفران رنگے میرا مان شانتگ*
پیشانیگء فردوسے مھر نشان بیتگ*
نازرک ایں صورت پراہ ؤ جوان بیتگ*
جنتی وش بوئین گلان بیتگ*
حکم شاہ ایرانی بر قرآر بیتگ*
دکتر چہ تہرانء روان داتگ*
برادران پہ جانی کوپگء زورتگ*
خواھرء چاپ ؤ صوتے مان بستگ*
مردم ؤ سرکارء تمام دیتگ*
گون وت ؤ سواسان قبرا واپینتگ*
غلام جان رفتگ یک ملک ؤ کشورے دورین*
وپتگ ماں قصر ؤ بادگیرے شیرین*
رفتگ ؤ واتر نہ بیت میرین*
دشمن ؤ وش میاتکان تئ بلاہ زیرین*