اللہ ؤ تبارک و تعالیء پہ ھر درد ؤ دوتء درمان ؤ علاج پیداگ کتگ

ھرچ دردے ؤ نادراھیۓ اللہ پاکء آئ دواء درمان ھوں صد در صد اڈ کتگ.

فرس ؤ رومء دئورء کہ مسترین زور آورین ملکت انت ماں رودراتکی دنیایء .

مسترین حکیم
و طبیب درمان ؤ دارگی لقمان حکیم ات

یک مردے نادراہ بیت کہ دکتران دراھین چہ آئ یۓ دواء ؤ درمان کنگء در منت انت.

گھوڑا مردء گوشت کہ منء لقمان حکیمی کرء ببر ات.

وھدے کہ آئ چک ؤ محرمان آئء لقمان حکیمی گورا برت
لقمان حکیمی چم ھنچو کہ پہ آئء کپت، گوشتی تئ علاج ؤ دواء منی پانگء نیست انت.

گھوڑا اے مردء فکر جت کہ منی دواء ؤ علاج وھدے کہ لقمان حکیمی کرا نیست گھوڑا ھچ جاہ نیست ؤ منی علاج موت انت چہ اے بی زارین زندگیئ موت وشتر انت کہ من بونڈکانی سرا کپتگان ؤ اے دگہ دراھین مردم ھوں دلسیاہ کتگ انت.

گوشتی منء گورستانء ببرئت مردمان حیران بیت انت کہ اے و زندگ انت ما چون اشیا گورستانء ببرین.

بلے چہ فرمانء مجبور بیت ؤ مرد اش گورستانء برت ؤ مردء گوشت منء ھمئدا ایر کنئت ؤ شما برو ات ؤ رندا پدا بیای ات مردمان ھمودا ایر کت ؤ شوت انت ؤ مردمان چہ آئ دستورء
مجبور بیت انت.

ھنجو کہ مردم شوت انت یک جمبڈے مان بست مردا فکر کت کہ نے پدل مرتگان ؤ منء ھور وت کشی ؤ ھور بیت چہ یک گلی ؤ خاکی قبرے یک دستے ظاھر بیت کہ تاسے برزاد داشتگ ات کہ ھور آپ ھمے تاسے توکء بریچ انت.

ؤ یک وھدے یک سیاہ مارے ھوں در آتک ؤ پیداگ بیت دیم پہ ھمے مردے کہ ھما دگہ قبر کہ تاسی داشتگ ات ھمشی یۓ نزیک ؤ بغلایت کہ دستء دراج بگنت رسیت مردا فکر کت منء ھورا نکشت نوں منء سیاہ مارے کشیت.


سیاہ مار آتک ؤ ھمے تاسے توکء شانتی ؤ شوت.
مردا چارئت کہ منء ھورا ھوں نکشت ؤ نۓ کہ مارا منء ڈنگ جت اے مردء فکر کت کہ من ھمے سیاہ مارے زھران وران بلی جلدی تر مران.

وھدے کہ یک گولمبے وارتی کمکے چہ رند مرد کمے بھتر بیت پدء کمے چہ رند پاد آتک ؤ نشت بدء کمے چہ رند پاد آتک ؤ اوشتاد کہ پیسرء نشتی نہ کتگ ات.


مردمان پدء آتک انت کہ بارئین بیمار چطور بیت چارت اش کہ
نادراہ و دراہ انت.

مردء گوشت منء پدء لقمان حکیمی کرا ببر ات مردمان ھمودا برت.

مردء گوں لقمان حکیم گوشت چطور تو گوشت کہ تئ دواء پانگ من نیست.

لقمان حکیم گوشت کہ تو ھوری آپ ؤ ماری شانوک وارتگ ؤ اے ھر دوکئین دوا پانگ من نبیتگ انت من پمشکء گوشتگ کہ تئ علاج منی کرا نیست.

سبحان اللہ

برے بیہوش ؤ وھدے من پہ ساران

برے بی ھوش ؤ وھدے من پہ ساران*
کدی فکر ؤ ھیالان گران ایں باران*

غمانی گوستگ این ظلمان شکاران*
شپی پاسان غنوکی کیل ؤ کالان*

غنوکی نشتگان دوستء وداران*
گون نؤد ؤ جمبڈان ھور ؤ أواران*

رواج ؤ ملگان کبگی تئ گاران*
گلء پہ کاغد ؤ کراچے کاران*

ھموک روچء جنان فکر ؤ خیالان*
دلے ارسان چہ پیما من بداران*

تپء گپتگ منء گرمینء ناران*
کئ آ گوشتگ پہ تو پرواہ نداران*

پر گیند ؤ قندگان تئ زھیر واران*
چو درویش ؤ فقیران واو ؤ زاران*

وتئ ماہ گونگء دردانء نالان*
وران آپین شرابء چو شغالان*

شپادان جنگلان ھنچو غزالان*
غمان پیر کت منی زند تئ اؤڈالان*

وتئ من بارگئین بورء سواران*
ودیگان پر تئ گند ؤ گداران*

بچاران زرگری مندریغ ؤ ھاران*
کہ یک انگشتری پر تو بیاران*

کدی تئ ڈکمین مودان بچاران*
گلاب ؤ یاسمین پلان شھاران*

نہ گیندان گر ترا بی تو خماران*
گران حالء تئ چہ دست گوھاران*

فروشتگ عبدالوھاب بازین خیالان*
پمشکء سنگاران بلوچی نایافتین گالان*

بیای برادراں لیرینان.

بیای برادران میرینان.
سوجاں اشکنئت پیرینان.

دم برت نیندگان بازینان.
گار بیتان غمان گرانینان.

گالانے گوشان جوانینان.
کل ایں شما بلوچ دراھینان.

کاران کسوان ھچینان.
وتئ کودکے دل ء سھڑینان.

روچان پر خیال گوازینان.
نیندان وتئ گلزمینء نازینان.

گلی جان پئریگ چہ کیچء بیاتگ

گلی جان پئیریگ چہ کیچء بیاتکگ.
چیا دوشی منی وابء نہ یاتکگ.

گلء پیشء منء خطے شخصاتگ.
گلے پیغامے وانگ من نہ زانتگ.

منء درد ؤ تپے سئ تاکی گپتگ.
گل اؤں بانوریء وھدے بدیتگ.

بلوچی پشک گشانء گوں رزئینتگ.
چو نگین ایں درے یاقوتء در آتکگ.

تنک ایں دیم گیوارء گروک وارتگ.
گوشۓ چو چاردھی ماہء پر آتکگ.

منی پرچی دلء مارے نہ وارتگ.
کہ دشتارء منی دگہ واستارے برتگ.

مۓ ھوش چہ سرا سالونک ایں رفتگ.
گلی جانء گوشۓ مشۓ نہ وارتگ.

نسیم ایں ساھگء سھبے آسکانیء سوتکگ.
چہ ملکء در شوتگ دریایے کنارء نشتگ.

بیا قاصد منی دوست ھمبلانی

بیا قاصد منی دوست ھمبلانی.
بدے دیمء بلوچستانء شلانی.

بجن صوتۓ کپوت ؤ بلبلانی.
یک وشین کسہ ؤ گالے زبانی.

ببر مارا چو بادا سر سرانی.
ماں دیوانء میۓ بیل ؤ یلانی.

بلوچستانے زئیدء کہچرانی.
ھمودا نشتگ انت مۓ مکرانی.

پدر مئک انت گوں بچان مہترانی.
پیر انت پئت ضرور دستء گرانی.

جنئکان نازگل ایں مات مھربانی.
عھدان نشتگ انت جودان غمانی.

ماہ رنگ ایں گلان لوگ بانوکانی.
سریگ زیبدار کتگ تاسین سرانی.

لنکوک نازرک ایں دست حنیانی.
درئنز انت عنطران مسک ؤ مہلبانی.

سرا کن چادرا ماہ گونگانی.
بکن وصفا بلوچی مۓ گلانی.

تعریفے دلی وشین گوشانی.
نقشین پشک ؤ پندول پیت نالوکانی.

نگیندان درورء دوچء بلوچانی.
رزئینتگ شال کریشیء گشانی.

منء دوستے وتئ گل ھمسرانی.
کپوتئ قندگ ؤ گپ نیم شپانی.

کشء بانے مدام نشتگ فلانی.
گودا دوچی سرے زانء ندرانی.

زر ایت ھمیشہ عبدالوھاب آسکانی.
پر دیوانء امیری چلیم ؤ تمباکانی.

گوشتگ من چندے گال پہ دست بندی

گوشتگ من چندے گال پہ دست بندی*

پر بلوچ قوم ؤ پشت پدان رندی*

کہ گپتگ ات طوفان ؤ جمبڈان گرندی*

شر کن ات آپ شونء لوگے عقل مندی*

ھیۓ کن ات مردان بلوچستانۓ جلدی*

کہ ھر کس پر ڈیہا وتی سرا بندی*

گور شما گر نیست انت مصلحت پندی*

گوڈء ملکموت زھران شمۓ سرا چنڈی*

اۓ دو پادین گرک پر پدان شمۓ گنجانی گردی*

پلئین بلوچستانء سرکار سرجمین گیندی*

دست ؤ پادان مۓ یک پہ یک بندی*

پروش ایت سرینء ؤ مۓ دلء سندی*

روت ماں کلاتء ؤ ماڈیء نیندی*

پہ مۓ سرا دراھین بلوچانی قندی*

گر دیم کن ات رھبندء خداوندی*

بکشیت رب عقل ؤ بخت خردمندی*

دے مارا رب تو ھمتء مردی*

یک قدرت ؤ توفیقے صحت مندی*

یک جی ؤ جانے چق انت دولتمندی*

فروش انت کلاتان غریب پہ دل ژندی*

عبدالوھاب پر دراھین راجء دلبندی*

کہ مارا ھست انت پر بلوچستان بازئین آرزومندی*

مرد پہ مئرگ وارے نہ بیت

مرد پہ مئرگ وارے نہ بیت.
نامرد روت ؤ گارے بیت.

دیما چہ وت بی زارے بیت.
بیل ؤ یلانی سرا بارے بیت.

جہل ایں زران اوگارے بیت.
ٹیہ ؤ غلامانی یارے بیت.

گون چوریگان سنگسارے بیت.
زالی پہ روپگ گر ؤ دارے بیت.

آپ ایں شراب غموارے بیت.
ھوکے وڈلء خمارے بیت.

رھزن ؤ دز ؤ خرام وارے بیت.
خدا ؤ رسولے گناہ کارے بیت.

گون آسکانیء ھر روچ زھرے بیت.
روت کوہ ؤ ڈوکانی میارے بیت.